ხათუნა ყოჩაშვილი დაწყებითი კლასების მენტორი მასწავლებელია,  პროგრამის- „ქართული დიასპორისთვის დისტანციური სწავლების მხარდაჭერა“ –  პედაგოგი, მასწავლებლის სახლისა და განათლების სამინისტროს ტრენერი, ევროპული სასკოლო საზოგადოება eTwinning-ის  ვარსკვლავის მფლობელი, გამომცემლობა „დიოგენეს“ ბუნების ტესტების ავტორი, „33 გასაღები“-ის  წიგნების კრებულის თანაავტორი, საბავშვო პოეტი, სცენარისტი, მეთოდისტი, ქორეოგრაფი, ანიმატორი.

ხათუნას პედაგოგიური პრაქტიკა ემყარება დემოკრატიის პრინციპებს, ადამიანის სიყვარულს, პროექტებით სწავლასა და ინოვაციებს. მისი  წარმატებული პედაგოგიური პრაქტიკის საფუძველი ინკლუზიური განათლებაა. ის ერთ-ერთი პირველი იყო, ვინც ატიპიური მოსწავლეების ტიპურ ბავშვებთან ინტეგრაციას  შეუწყო ხელი.  ჩაატარა კვლევა მოსწავლეთა კოგნიტურ განვითარებაში სიუჟეტური სურათების როლზე. ღირებულებითი განათლების ხელშესაწყობად 2010 წლიდან დანერგა ფილმებით სწავლების პრაქტიკა, რითაც ათეულობით ბავშვი დაიცვა ბულინგისაგან. გააცოცხლა არაერთი ძველი და შექმნა უამრავი ახალი თამაში.  მოსწავლეებს დაეხმარა  კოგნიტური, მოტორული და ფიზიკური უნარების განვითარებაში. აამუშავა კლუბები: „გამარჯობა რუბი“, „ციფრული ელჩები“, „ნორჩ მკითხველთა ორდენი“. განახორციელა ინოვაციური პროექტები: „ჩხირკედელა“, „მე ვარ საქართველო!“, „გაჯობე, მასწ! “, „მხიარული ვიქტორინა“, „მოსწავლე ჩემი მასწავლებელია“. „ქართული  დიასპორისთვის დისტანციურად მხარდაჭერა“ პროგრამის ფარგლებში 400-მდე ქართველ ემიგრანტ ბავშვს ასწავლა ქართული ენა. ცეკვით გააცოცხლა ანბანი.

ხათუნა ყოჩაშვილმა, როგორც ტრენერმა, ხელი შეუწყო  მენტორ-მაძიებლობის, G-PriED-ის, eTwinning-ის, მასწავლებელთა პროფესიული განვითარების სქემის, „ევროპა ჩემს გაკვეთილზე“, „ციფრული სკოლის“, „კომუნიკაციების კომისიის“, „ახალი სკოლის მოდელის“   პროექტების დანერგვას.  2015 წელს სოციალურ ქსელში შექმნა დაწყებითი კლასების პედაგოგთა ჯგუფი, რომელიც 10 წელია მოხალისეობრივად ეხმარება პედაგოგებს წინსვლასა და  პროფესიული პრობლემების მოგვარებაში.  შექმნა ბლოგი  „ ხათუნა ყოჩაშვილის პორტფოლიო“, სადაც მუდმივად აზიარებს თავის გამოცდილებას. 2019 წელს პედაგოგებისათვის მოხალისეობრივად ჩაწერა  პროფესიული უნარების საგამოცდო ტესტების 42 ვიდეოგზამკვლევი. მოსწავლეებისა და მასწავლებლებისათვის შექმნა  მატერიალური და ელექტრონული წიგნები ქართული ენისთვის,  ხოლო მათემატიკისთვის-ანიმაციები, გაკვეთილის გეგმები, მეთოდები.  

ხათუნას ინიციატივით მისი სკოლა მეგობრობს საქართველოს ბევრ და  ევროპის სხვადასხვა ქვეყნის სკოლებთან და მათთან ერთად ახორციელებს პროექტებს. სკოლაში შექმნა  საინტერესო,  სახალისო სივრცეები, ჩაატარა კვლევები პედაგოგთა საჭიროებების დასადგენად, ხელი შეუწყო პედაგოგთა პრობლემების იდენტიფიცირებას და მოგვარებას.

 ქალაქში ქვეითად მოსიარულეთა უსაფრთხო გადაადგილებისთვის  უზრუნველყო   ქვეითთა გადასასვლელის მანიშნებელი სპეციალური ნიშნებით ქუჩის დახაზვა. ეკოპრობლემებისა და ჯანსაღი ცხოვრების წესის დასანერგად განახორციელა არაერთი საერთაშორისო პროექტი.