შალვა მინდაძე ისტორიკოსია, შუა საუკუნეების კვლევების მაგისტრი, მასწავლებელი და განათლების კონსულტანტი. შუა საუკუნეების კვლევების მიმართულებით 2023 წელს დაამთავრა ილიას სახელმწიფო უნივერსიტეტის მაგისტრატურა. შალვა ასწავლის ისტორიასა და სამოქალაქო განათლებას თბილისის 70-ე საჯარო სკოლაში, ასევე, 2017 წლიდან მუშაობს შალვა ამონაშვილის ჰუმანური პედაგოგიკის აკადემიაში. კარიერა დაიწყო მარნეულის მე-2 საჯარო სკოლაში, სადაც ორი წელი მუშაობდა არაქართულენოვან მოსწავლეებთან და ასწავლიდა ისტორიას და ხელმძღვანელობდა საგამოცდო და მონიტორინგის ცენტრს.
საგანმანათლებლო პრაქტიკაში შალვა მინდაძე აქტიურად იყენებს შებრუნებული საკლასო ოთახის მოდელს (flipped classroom), თამაშზე დაფუძნებულ სწავლებას (gamification), როლურ თამაშებსა და საგნობრივ დებატებს. ხშირად მიმართავს ინტეგრირებულ გაკვეთილებს, მუზეუმში ვიზიტებს და თემატურ ფილმებს, მოსწავლეების ჩართულობისა და კრიტიკული აზროვნების განსავითარებლად. მნიშვნელოვან დროს უთმობს თანამედროვე ციფრული რესურსების გამოყენებასაც (Kahoot, Quizlet, OneNote (280-მდე პრეზენტაცია), Testmoz), უკუკავშირის სისტემურ ანალიზსა და კრიტიკულ მეგობრობას, რაც უზრუნველყოფს მოსწავლეთა ინდივიდუალურ პროგრესსა და სწავლის ეფექტიანობას. მარნეულში სკოლის მოსწავლეების მონაწილეობით გადაიღო დოკუმენტური ფილმი 9 აპრილის შესახებ ადგილობრივ დონეზე ფართოდ აღიარეს და მოსწავლეთა სამოქალაქო აქტივიზმის ნიმუშად იქცა. შალვა აქტიურად მონაწილეობს ბავშვთა მიმართ ძალადობის წინააღმდეგ მიმართულ საინფორმაციო კამპანიებში, ქმნის თემატურ საგანმანათლებლო ვიდეოებსა და ფილმებს, რომლებიც მიზნად ისახავს მოსწავლეებში ცნობიერების ამაღლებასა და ძალადობის პრევენციას.
შალვა მინდაძის ინიციატივით შეიქმნა ისტორიის საგანმანათლებლო პლატფორმა და ვებგვერდი, რომელიც მოიცავს 1500-ზე მეტ ვიდეორესურსს და 1000-ზე მეტ საგანმანათლებლო მასალას. დააარსა ისტორიკოსთა კლუბი „იბერიელები“, ვიკიპედიის სასკოლო კლუბი და ბლოგი (გადაცემებით: „10 კითხვა მასწავლებელს“, „წარსულთან საუბარი“), სადაც ქვეყნდება მასწავლებლებისთვის საჭირო სტატიები და თარგმანები (300-მდე სტატია). რეგულარულად ატარებს საჯარო ლექციებს („კაცი მასწავლებლები“ – სეუ 2023; „წარსული და თანამედროვე აზროვნება“ – ცოდნის ძალა 2023; „უსახსრობა VS განათლება“ – სეუ 2024).
სკოლაში შალვა აქტიურად თანამშრომლობს კოლეგებთან. მისი ინიციატივით მიმდინარეობს ინტელექტუალური ჩემპიონატები, ექსკურსიები, სალექციო შეხვედრები და სამუზეუმო გაკვეთილები. აქტიურად მუშაობს აფხაზეთიდან დევნილ და აზერბაიჯანელ მოსწავლეებთან, აწყობს სოციალური ხასიათის კურსებს და აქტიურად თანამშრომლობს მასწავლებელთა პროფკავშირთან, საგანმანათლებლო კოალიციასა და ადგილობრივ თემთან. შალვა მინდაძე ფიქრობს, რომ მასწავლებლობა საზოგადოების წინაშე პასუხისმგებლობაა, მიზანი კი მოსწავლეთა აკადემიური წარმატების, მოქალაქეობრივი ცნობიერებისა და პიროვნული ღირსების გაძლიერება უნდა იყოს, რაც საბოლოოდ უკეთესი და დემოკრატიული ქვეყნის ფორმირების საფუძველს ქმნის. როგორც მოქალაქე, შალვა მინდაძე განსაკუთრებული პასუხისმგებლობით უდგება ადგილობრივი თემისა და საზოგადოების წინაშე არსებულ გამოწვევებს. საქართველოს სხვადასხვა რეგიონში სისტემატურად ახორციელებს სოციალური ხასიათის საგანმანათლებლო კურსებს უფროსკლასელებისთვის, რომლებიც მიმართულია საუნივერსიტეტო ცხოვრებისათვის მომზადებისა და მათი მოქალაქეობრივი ცნობიერების ამაღლებისკენ. გარდა ამისა, აქტიურად მონაწილეობს ისეთი პროექტების განხორციელებაში, როგორიცაა „სამოქალაქო საზოგადოების ადგილობრივი ლიდერების ახალი თაობის გაძლიერება საქართველოში“ (ISFED), ასევე პოლიტიკური სკოლის პროექტი Friedrich Naumann Foundation for freedom south Caucasus რაც ხელს უწყობს თემის სოციალური და დემოკრატიული განვითარების პროცესს.
მასწავლებლის ეროვნული ჯილდოს გენერალური სპონსორია გუდავაძე-პატარკაციშვილის ფონდი
საქართველოს ბანკი მასწავლებლის ეროვნული ჯილდო 2025-ის მთავარი მხარდამჭერია
