ჟანა ხაჩატურიანი სსიპ ი. ჭავჭავაძის სახელობის ქალაქ ახალქალაქის მე-3 საჯარო სკოლის სამოქალაქო განათლებისა და მე და საზოგადოების მასწავლებელია, სამცხე-ჯავახეთის სახელმწიფო უნივერსიტეტის პედაგოგი, ფილოლოგიის დოქტორი და ზურაბ ჟვანიას სახელობის სახელმწიფო ადმინისტრირების სკოლის ტრენერი. ის გახლდათ USAID-ის საბაზისო-დაწყებითი განათლების პროგრამის ფარგლებში მასწავლებელთა ტრენერი, ასევე თანამშრომლობდა საქართველოს საზოგადოებრივ საქმეთა ინსტიტუტთან .
2014 წელს, სამოქალაქო განათლების პედაგოგთა ფორუმის მიერ, დაჯილდოებულია როგორც – “სამოქალაქო განათლების წლის საუკეთესო პედაგოგი”.
თვლის, რომ მისი, როგორც პედაგოგის, მნიშვნელოვანი საკვანძო მიღწევა გახლავთ სადისერტაციო ნაშრომი -“სახელთა ბრუნება ქართულსა და სომხურ ენებში”, იმედოვნებს, რომ მის კვლევას, სწავლა-სწავლების პროცესში, მასწავლებლები აქტიურად გამოიყენებენ. სწავლების ეფექტიან მეთოდებზე გამოქვეყნებული აქვს სტატიები როგორც საქართველოში, ასევე საზღვარგარეთ, კერძოდ, თურქეთსა და სომხეთში.
ჟანას ინიციატივით სკოლაში ფუნქციონირებს სამოქალაქო განათლების კაბინეტი და სამოქალაქო განათლების კლუბი. სწავლების პროცესში აქტიურად იყენებს ინტერაქტიური და ინტეგრირებული სწავლების ფორმას, მრავალფეროვანი პროექტებისა და აქტივობების საშუალებით ცდილობს, დაწყებითი კლასებიდანვე მოსწავლეები შეაჩვიოს ფიქრს, აზროვნებას, მსჯელობას და ხელი შეუწყოს მოსწავლეების პასუხისმგებლობიან მოქალაქეებად ჩამოყალიბებას, რომელთაც გააზრებული ექნებათ დემოკრატიის მნიშვნელობა, ადამიანის უფლებები, განსხვავებულისადმი პატივისცემა.
საჭიროებისამებრ ატარებს საინფორმაციო ტიპის შეხვედრებს თემში, სხვადასხვა სკოლის მოსწავლეებთან, მათთვის აქტუალურ თემებზე. ამით ცდილობს, ქართული და არაქართული სკოლის მოსწავლეების ინტეგრაციას შეუწყოს ხელი, დაანახოს საერთო პრობლემები, რომელთა მოგვარებაზეც ერთად იზრუნებენ.
არაერთი კვლევის თანამონაწილეა, აქტიურად იყო ჩართული სამცხე-ჯავახეთის სახელმწიფო უნივერსიტეტის მიერ განხორციელებულ კვლევაში, რომელიც იკვლევდა ეთნიკური უმცირესობებისათვის ხარისხიან განათლებაზე ხელმისაწვდომობის ხარისხს. უშუალოდ ამ საკითხზე მომუშავე ჯგუფმა ერთობლივად შეიმუშავა 4+1 პროგრამის ფარგლებში წარმატებისა და მიღწეულის დახვეწა-გაუმჯობესებისთვის რჩევები და რეკომენდაციები.
„დედაჩემის ბედნიერების ცრემლებით სავსე თვალები არასოდეს დამავიწყდება”, – ჟანა ხაჩატურიანი
edu.aris.ge
