მარიამ კვაჭაძის პედაგოგიური პრაქტიკა ეფუძნება რწმენას, რომ განათლების მთავარი დანიშნულება მხოლოდ ცოდნის გადაცემა კი არა, არამედ თავისუფალი, კრიტიკულად მოაზროვნე და პასუხისმგებლობიანი მოქალაქის ფორმირებაა.
მისთვის ფუნდამენტურ ღირებულებებს წარმოადგენს თანასწორობა, ინკლუზიურობა, ნდობაზე დაფუძნებული ურთიერთობა, დემოკრატიული კულტურის გაძლიერება, შემოქმედებითი თავისუფლება და უწყვეტი პროფესიული განვითარება. მაღალმთიანი რეგიონის მცირე სკოლაში მუშაობა მარიამისთვის მხოლოდ პროფესიული საქმიანობა არ არის; ეს არის სოციალური პასუხისმგებლობა, რომელიც მიზნად ისახავს, გეოგრაფიულმა იზოლაციამ არ განსაზღვროს მოსწავლის საგანმანათლებლო შესაძლებლობები.
მისი პედაგოგიური პრაქტიკის ყველაზე მნიშვნელოვანი საზომი მოსწავლეთა მიღწევები და მათი პიროვნული ტრანსფორმაციაა. მან შეძლო, შეექმნა ისეთი სასწავლო გარემო, რომელშიც მოსწავლეები მხოლოდ საგნობრივ ცოდნას კი არ იძენენ, არამედ ყალიბდებიან დამოუკიდებელ, კრიტიკულად მოაზროვნე, წიგნიერ და აქტიურ მოქალაქეებად. მისი ხელმძღვანელობით მოსწავლეები წარმატებით მონაწილეობენ სხვადასხვა საგანმანათლებლო პროექტში, კონკურსსა და კონფერენციაში, ქმნიან შემოქმედებით და კვლევით ნამუშევრებს. განსაკუთრებით აღსანიშნავია, რომ მცირეკონტინგენტიანი მაღალმთიანი სკოლის პირობებშიც კი შეძლო, შეექმნა მაღალი მოლოდინებისა და წარმატების კულტურა, სადაც თითოეული მოსწავლის პროგრესი ინდივიდუალური მხარდაჭერისა და მიზანმიმართული მუშაობის შედეგია. მისთვის ყველაზე დიდი მიღწევა მოსწავლეთა აკადემიურ წარმატებაზე მეტად მათი შინაგანი ცვლილებაა – როდესაც ისინი იწყებენ კითხვას, აზროვნებას, პოზიციის დაცვას და საკუთარი შესაძლებლობების რწმენას. სწორედ ამგვარი შედეგები ადასტურებს, რომ განათლება შეიძლება გახდეს სოციალური ცვლილებისა და მომავლის შექმნის ყველაზე ძლიერი ინსტრუმენტი.
მარიამის საქმიანობა სცილდება ერთი კლასისა და ერთი სკოლის ფარგლებს და ემსახურება როგორც მასწავლებლის პროფესიის, ისე ქართული ენისა და ლიტერატურის სწავლების განვითარებას. იგი აქტიურად უზიარებს კოლეგებს საკუთარ პრაქტიკას, ატარებს შეხვედრებსა და ტრენინგებს თანამედროვე სწავლების მეთოდებისა და არაფორმალური განათლების მიმართულებით. ცდილობს, პროფესიულ საზოგადოებაში გააძლიეროს თანამშრომლობითი კულტურა, გაუზიაროს გამოცდილება და დანერგოს ინოვაციური მიდგომები. პარალელურად ქმნის მრავალფეროვან სასწავლო რესურსებს, პროექტებსა და აქტივობებს, რომლებიც ქართული ენისა და ლიტერატურას თანამედროვე სოციალური, კულტურული და დემოკრატიული საკითხების კონტექსტში წარმოაჩენს.
აქტიურად მონაწილეობს ისეთი ინიციატივების განხორციელებაში, რომლებიც აძლიერებს სკოლისა და თემის თანამშრომლობას, ზრდის განათლების ხელმისაწვდომობას და ახალ შესაძლებლობებს ქმნის ადგილობრივი ახალგაზრდებისთვის. მისი საქმიანობა მიზნად ისახავს სკოლის გარდაქმნას თემის კულტურულ და საგანმანათლებლო ცენტრად, სადაც სწავლა გაკვეთილით არ სრულდება. იგი ორგანიზებას უწევს პროექტებს, ლიტერატურულ და საგანმანათლებლო აქტივობებს, რომლებიც მოსწავლეებს, მშობლებსა და თემის წარმომადგენლებს საერთო ღირებულებების გარშემო ერთიანებს. მისი მოქალაქეობრივი პოზიცია ეფუძნება რწმენას, რომ მასწავლებელი მხოლოდ ცოდნის გამცემი არ არის – იგი არის საზოგადოების განვითარების აქტიური მონაწილე, კულტურული მეხსიერების გამტარებელი და პასუხისმგებლობიან მოქალაქეებად ჩამოყალიბების ერთ-ერთი მთავარი მხარდამჭერი.
