სალომე ფურცხვანიძე 2013 წლიდან მუშაობს სსიპ მესტიის მუნიციპალიტეტის სოფელ მულახის საჯარო სკოლაში დაწყებითი საფეხურის და მეწარმეობის საფუძვლების მასწავლებლად.

სალომეს პედაგოგიური პრაქტიკისათვის დამახასიათებელია მოსწავლეების სოციალური და გამჭოლი კომპეტენციების განვითარებაზე ზრუნვა. ის თავის საქმიანობას ახორციელებს როგორც ფორმალური ასევე არაფორმალური სწავლების მეთოდების გამოყენებით: სასწავლო და სოციალური პროექტები, კეთებით სწავლება, თამაშით სწავლება, კლუბური მუშაობა.

სალომე ეხმარება მოზარდებს ტოლერანტ, პასუხისმგებლიან და მაღალი სამოქალაქო ცნობიერების მქონე მოქალაქეებად ჩამოყალიბებაში. ცდილობს დააინტერესოს ისინი და გაარკვიოს მდგრადი განვითარების მიზნების მნიშვნელობაში. ყოველი კლუბური აქტივობის შემდეგ აცნობს მათ თუ რომელ მგმ-ს ეხმიანებოდა განხორციელებული საქმე. სამეწარმეო უნარების განვითარების მიზნით ის ახორციელებს ჯიპრაიდის ბიზნეს პროგრამებს, ხოლო საშუალო საფეხურის მოსწავლეებისათვის კი პროგრამას აგრო კოოპერაცია და მეწარმეობა.

სალომე ფურცხვანიძე სამი სასკოლო კლუბის დამფუძნებელი და კურატორია. ის მიიჩნევს, რომ მნიშვნელოვანია მოსწავლეებს განუვითაროს საზოგადოებრივ ქონებასა და გარემოზე ზრუნვის უნარები. მან განახორციელა პროექტი ,,ჩვენი მეგობარი მცენარეები“ რომლის ფარგლებშიც, პატარებმა, მიიღეს მნიშვნელოვანი თეორიული და პრაქტიკული ცოდნა, განივითარეს კვლევის უნარები. ასევე, მისმა დაარსებული ეკოკლუბი ნიკო კეცხოველის სასკოლო პრემიის სამგზის ფინალისტი და პარლამენტის რჩეულია. ბიზნესის კლუბი ყოველწლიურად მონაწილეობას იღებს სასკოლო მინი კომპანიების გამოფენა-გაყიდვაში და 2019 წლის საუკეთესო გაყიდვების პრიზის მფლობელიც გახდა.

სალომე მასწავლებლის პროფესიის პოპულარიზაციის მიზნით ხშირად იღებს მონაწილეობა კონკურსებში, კონფერენციებში, თანამშრომლობს სამთავრობო და არასამთავრობო სექტორთან. ამასთან, ის მჭიდროდ თანამშრომლობს თემთან და მოსახლეობასთან ერთად ახორციელებს სხვადასხვა პროექტებს. აღსანიშნავია ინიციატივა „დააკალმე შენი ბზა”. სალომე ხშირად მართავს ლექცია სემინარებს, აწყობს შეხვედრებს, გადაწყვეტილი აქვს სოფელში გააკეთოს სამკითხველო, მართავს დასუფთავების მასშტაბურ აქციებს.

სალომე თვლის რომ მასწავლებლობა ეს არ არის მხოლოდ ამა თუ იმ საგნის კარგად ფლობა, მასწავლებლობა არის უამრავი სხვა უნარის ფლობა და კონკრეტული გამოწვევისათვის შესაბამისი უნარის მისადაგების ალღო.

ბიოგრაფია

სალომე ფურცხვანიძე დაიბადა 1983 წელს ქუთაისში. დაამთავრა სოფელ სორმონის საშუალო სკოლის 9კლასი, სწავლა განაგრძო ქუთაისის საბუნებისმეტყველო პროფილის სკოლა-ლიცეუმში. 2000 წელს გახდა საქართველოს სუბტროპიკული მეურნეობის სახელმწიფო უნივერსიტეტის აგრობიზნესის ფაკულტეტის სტუდენტი და მიიღო მცენარეთა დაცვის სპეციალისტის განათლება. 2003 წელს ჩაირიცხა ა. ვასაძის სახელობის კულტურულ საგანმანათლებო სასწავლებელში საგუნდო-სადირიჟორო და კულტურულ-საგანმანათლებლო დაწესებულების მენეჯერის სპეციალობაზე. 2005 წელს გაიარა ბასისა და ბაფის საერთაშორისო ბუღალტრული პროგრამის კურსი და მიიღო ბუღალტრის კვალიფიკაცია. სალომე 2013 წლიდან მუშაობს ზემო სვანეთის მაღალმთიან სკოლაში დაწყებითი კლასისა და მეწარმეობის საფუძვლების მასწავლებლად. არის სამი სასკოლო კლუბის დამფუძნებელი და კურატორი. 2019 წელს მონაწილეობდა მასწავლებლის ეროვნული ჯილდოს კონკურსი და გახდა ათეულის წევრი. სალომე დაოჯახებულია, ჰყავს მეუღლე და სამი შვილი.